قیزا ائلچی گلیر
ائلچی دیگولن هر ائوه کی اولدی روانه
سو ایچماقی قیز گؤرماقا ائیلرلر بهانه
کم کم سؤز آچاللار: «او خانم قیز هانی گلسین،
وئرسین بیزه سو خئیر ایشیمیز بلکه دوزلسین»
قیز بولسه ائوه ائلچی گلیبدی قاچار اورادان
فورن سخیلار دالدا بوجاقا اولی پنهان
سلر قیز آناسی قیزینی :« بیرجه یوبانما،
قیز گل ایچری، سویی گتیر، دورما دایانما»
بیردن نه گؤرر، قیزدان اثر یوخدی جوموبدی
بیلمز کی اونون ویرقینی مطبخده توموبدی
قالخار قویار ائوده قوناقین یکه و تنها
سرعتله اولور زئرزمینی، مطبخی جویا
آخیرده تاپار بیر نئچه چیمدیک گؤتورر برک
آغزیندان او ساعت سالی باتمانجا توپورجک
بیر بامبا چاغیظیله ویرار اوردا باشیندان
هرگز یئمه میشدی ائله دوتمه یاشیندان
فکر ائیله، اوقیز گؤر ائله بیر حالده نئیلیر
آغلار، ایکی اللی قاراما باشینا گوبسر
باشلار دئینر: «دئینه گؤروم بوردا نا واردی؟
چوخداندی کی سیز طایفه دن عقل کناردی
گؤردی کی قیزا هرنه دییر دورمور ائدیر ناز
آچدی یوموشاق دیللرینی، گولدی بیر آز- ماز:
«دور گل مامانیم ویر اؤزوه پستودا زینت
ائلچی گلیب آخیر بالادور گل ائله خدمت
گؤرسینله کی خوشبخت اولی، آلسا سنی هر کیم
اما بولوسن وارد اولاندا ائله عظیم
قربان اولوم یئپ – یئکه قیزسان هئچ اوتاما
دهلیزده دو، گل سسله سم هر وقت دایانما»
وقت اولدی کی قیز نازیله اوز قویدی اطاقه
گؤرسونلر ادب معدنی دی باشدان – ایاقه
لاکن باشینی قوزامیری شرم وحیادن
حفظ ائیله سین آللاه بو قیزی درد و بلادن
سو وئرماق همان دوندی ائله قاشدی او مالباش
آز قالدی یخیلسون ائله بیر تیتره دی دام – داش
سسلندی آناسی قیزینا:« گل بورا آی قیز
آدامدا قویار اؤز قوناقین ائوده ده یالقیز؟»
چون گؤردی ائوه گلمدی، شرم ائتدی بالاسی
دوردی اؤزی چای وئردی قوناقه، قیز آناسی
از بسکی جوبوق چکدیلر توسسی ائوی توتدی
ائو صاحبی آخیر نه دئسون، حرصینی اوتدی.
«اعتماد»
علامه جعفری: خدایا تو را سوگند به عظمتت در این دار دنیا که جایگاه بده و بستان و معامله است موفق بفرما که ما مغبون نشویم آنچه که می گیریم بیارزد در مقابل آن سرمایه الهی حیات که از دست می دهیم