1

سایین اوخوجولار یازیلاریمی اوخویاندا دئنمه سینلر پیس اوشاقدا کؤهنلمیش خبرلری یازیر. دئملی یم بد بوی اسپورت نیوز دونیانین ان آنلاین ستونودور. من باخیجیلار کیمی بیرزادام. فدراسیونون طالعینه باخیب اویونو اوینامامیشدان گزارشین یازارام!! مثلن جدولین شرایطینه باخسام بیلرم تیراختور ایله فیلان تیمین اویونوندا داورین فیشقاسین نه جور کؤکله ییبلر! هاندا قالسین اویونون سونوجو!!

یالنیز بیر-ایکی ایرادیم وار. درگی تهراندا چاپ اولور آما من تبریزده ویرنیخیرام. اونا گؤره بیر هفته ده کی سوژه لری یازیب صفحه لر باغلانمامیشدان درگییه گؤندریرم. میثال اوچون بو اویونون یازیلارین مس-تیراختور اویونوندان قاباق یازمیشام. اونا گؤره بو اویونون یازمالی طنزی اولسا همن یازیب یئتیرمک مومکون دئییل. اونا گؤره قالیر گلن سایییا!!


2

آی بالا، هانسی مملکتین فوتبال گزارشگری بیر تیمین طالعینه ده باخا بیلر؟ تیراختور-پیکان اویونوندا علیفر اویونو گزارش ائتمک یئرینه فیلیم چکنلر ایله بیر اولوب تیراختورون ساییسین آز گؤسترمک ایسته دی. علیفر هئی دئییردی : استادیومدا ایکی مین نفر تیراختورچو وار!!

دوربونلر ایسه همشه کی کیمی استادیومون بیر طرفین یایینلاییردی. هله بو مساله بیر طرفه بو آغا باشلامیشدی بیر باشدان دئییردی : بو تیم بو ایل بیر ایش گؤره بیلمه یه جک... بو تیم قهرمان اولانماز...بو تیمین هوادارلاری اؤز آرزیلارینا چاتمایاجاق...بو تیمین هوادارلاری یازیق اولاجاق...!!!

آخی سنین دیلین شیشسین کیشی!! سنی گؤروم کیف توتاسان!! سن پیسله دییین تیم اوچ گل ووردو دا، اوچ گلدان بیری قبول اولاندان سونرا آرتیق مربی ایله اویونچولار نئینه مه لیدیلر؟ بیرین دارو یاردیمچیسی گؤرمه دی. بیری خطا توتولدو. هله حاج صفی ووردوغو گولا بیر سؤز دئینمه دیلر یوخسا تیراختورو 1-0 اوتوزدورموشدولار.

آما ایندیکی یاخشی فیکیرله شیرم گؤرورم ائله بیل بو علیفرین پرده دالیسیندان خبری وارها، بو سؤزلری دئییر. حتمی بیر اییلر آنلاییب. بیلیر فدراسیونون نقشه لری تیراختورون قهرمان اولماماسینا نه لر دیر!! آی شولوق!!!

هله پیروزی04-گهر تیملرینین گزاریشینده شبکه 3-ون سایتی یازیب پیروزی04-ین تاماشاچیلاری 70000 نفر ایدی!! بیزکی استادیومون چوخون بوش گؤردوک. آزادی استادیومودا 80000 نفردن چوخ توتمور!!! ایندی سیز گؤرون اؤگئی بالا ایله دوغما بالانین گزارشده فرقلرینه!!


3

بو ایلکی لیگ پیروزی04 ایله استقلال تیملرینه ضررلی اولوب!! تهران تیملرینین چوخلوغو بو ایکی تیمین هفته لر بویو تهراندان چیخماماسینا نه دن اولور هئچ، باشقا اوستانلارین دا تیملری میزبان اولاندا آزادی دا اویناییر. البرز اوستانینین سایپا تیمی ایله لرستان-ین گهر تیمی بو ایکی تیمه میزبان اولاندا مجبور اولورلار تهرانا گلسینلر. دده! بیر دفعه نه اؤزوزو یورون نه بیزی، گتیرین برتر لیگین اویونلارین متمرکز حالتده تهران دا کئچیردین هامی راحاتلاشسین دا!! نییه اؤلکه نین باشا باشینا یازیق تیملری دولاندیریرسیز؟!!! اوندا خرجلرده آزالار. هر شهرده ده بیر استادیوم وورماق لازیم اولماز. یالنیز اصفهان تیملری اؤز شهرلرینده میزبان اولسونلار. آخی اونلار اورکلری نازیکدیر، اونا گؤره!

دئییرم بو ایکی تیمین حاق دانیشان مودورلری نئجه تیراختورا یئتیشنده دئییرلر تیراختورچولار یالنیز استادیومون یوزده اونون آلا بیلرلر، یاخشی دئمیرلر ایندیکی بیز اؤز شهریمیزده برنامه اوزویله باشقا تیملره قوناغیق تیراختورا یازدیغیمیز قانون بیزیمده تاماشاچیلارا شامیل اولسون!


4

علی کریمی دئییب : هوادارلار جواد نکونام-ا توهین ائتمسینلر!! عمران زاده ایسه دئییب : کئچن ایل هوادارلار 25-جی هفته دن تیمین علیه نه شعار وئرمه یه باشلادیلار. بو ایل چوخ تئز باشلاییبلار بو انصافسیزلیقدیر!!

آخی بو ایکی تیمین هوادارلاری توهین ایله تیمین علیه نه شعار وئرمکدن باشقا نه باشاریرلار؟ کئچن ایل ائله اولدو داوری ده بوش یئره یامانلادیلار. داورده اویونو کسیب، فیشقاسین گؤتوروب قاچدی. بونلاری ایشی بودو دای! ایش گرک بینؤوره دن دوز اولا، کریمی دئمک ایله دوزلمز کی! بئله کی گؤرورم بو استقلال تیمی خارراخار اوتوزاجاق. آما عمران زاده کوسمه سین دئیه هوادارلار شعارلاری قارینلارندا ساخلاییب، 25-جی هفته دن باشلاسینلار!! عمران زاده ده بیر کیشینین اوغلودور. سؤزون یئره سالمقا اولماز کی!!


5

پیروزی04 فجر تیمینه اوتوزدو. نه اولسون کی؟ اوتوزدو اوتوزدو دای! اوتوزماق ائله پیروزی04 تیمینین بویونا بیچیلب دا!! بو اویونون اؤنملی یئری اؤلکه نین قوجا کیشیسی، پورتاغاللی قوجا کیشینین قابیغین سویماق ایدی. دای خطا اولوب گونده اوتوزان تیم بیر سئری اوتوب، ایندی مربیسی دئییر: فجرین بودجه سی تبریزده خرجله نیر!!

یاوری-نین منظورو بودور کی هر ایکی تیم بیر ارگانین کیدیر آما تیراختورا چوخ خرجله نیر، فجره قالمیر. البته گرکده خرجله نه دای!!! تیراختور ایله فجری بیر یئرده توتماق اولارمی؟ بو ایکی تیمین تاریخینه هوادارلارینا شهرینه باخاندا تیراختور تیمی آغیرلیق ائدیر. تبریزده تیم اوتوزاندا هوادارلار یئنه ده تیمی آلقیشلاییرلار آما شیرازدا پیروزی ایله استقلال تیمینین هواداری اؤز شهرلرینین تیملریندن چوخدور. ائله اولور کی اؤز تیملرینین کاپیتانی کرنر ووراندا همشهری لری اونو داشا باسیرلار کی وورانماسین!! نئجه پیسدیر کی آدام اؤز شهرینده غریب اولا!!

بو حؤرمتلی قوجا کیشیدن بیر خاطیره دئییم. 78-جی ایلین لیگینده یاوری-نین تیمی تبریزده تیراختورا اوتوزاندان سونرا خبرنگارلارا دئدی : تبریزین هاواسی شاختادیر. اونا گؤره هر تیم بورا گلیر اوتوزور!!

دؤران دولاندی بو آغا تیراختورون مربیسی اولدو. قیشین فصلینده هاوانین لاپ شاختاسیندا بو آغانین باغلادیغی تیراختورو اوتوب گئتدی!! تیراختوردا فصلین سونوندا جدولین سونونجو تیمی اولدو!!